Kitty媽濕疹歷史對抗心態 (part 2 of 2)
「康復的道路並不平坦，但只要有信念、堅持做對身體好的事，就一定會見到曙光！」
睇完順勢治療師之後，我都冇去再做其他治療啦，冇幾耐之後我就結咗婚生左兩個小朋友，醫小朋友濕疹嘅時候，就算咁大壓力我嘅皮膚都一直相安無事，可能係我果時嘅潛意識話俾我自己知我唔可以冧，如果我冧嘅話佢哋會死梗。
好好彩因為我自己嘅經歷，我堅決唔用西藥去醫小朋友嘅濕疹。佢哋到兩歲左右就可以喺西醫嘅角度「奇蹟咁康復」，然後又再次「奇蹟地濕疹康復得來又冇哮喘」。即係兩個小朋友每個人都發生咗兩次奇蹟，總共四個奇蹟，呢個世界邊有咁多奇蹟？奇蹟嘅發生係因為我明白呢個病嘅根本，無論醫生點樣俾壓力我、嘲諷我唔用西藥我都唔理會，只會堅持從根本去醫治。
小朋友好返之後個故事仲未完嘅，因為我就係細女好返之後嘅兩三年，即係大概兩年前左右，我啲皮膚又出大事了。我Instagram有個核突大髀post就係我嗰時狀況，我唔敢肯定係因為之前已小朋友濕疹嘅時候嘅壓力囤積冇機會釋放，定係因為當時屋企係咁換新傢俬，又或者係嫲嫲因為重病去世。不過點都好，因為儲左咁多年經驗，我知道要好返都係我來去去靠嗰三樣嘢 — 健康飲食，爆汗運動，同埋喺好多限制嘅情況之下幫自己減壓，其實就即係好廢好簡單嘅「保持身心健康」。
「生活總是讓我們遍体鳞傷，那些受過傷的地方成為我們努力走過的證明，將來一定会成為我們最強壯的地方。」
好多濕疹朋友都同我反映，生病嘅時候唔想煮嘢，因為好攰、訓得唔好、唔識煮野。佢地又話唔想做運動，因為怕汗水醃到皮膚唔舒服，怕傷口惡化。我當然明白病緊嘅時候真係咩都唔想郁，因為我都經歷過。以我兩年前為例，你唔好話煮嘢食，我屙完屎都唔想洗手，因為每一次洗手真係痛到十指歸心。但係我更加唔想呢個病控制住我，當我諗到我嘅全部人生會比呢個病毁於一旦，我就會變得好有動力。做運動嘅時候無論身上面乾裂嘅黃水傷口令到我有幾痛都照做（澳洲嘅乾燥同香港冇得比）。夜晚幾乎冇瞓過覺但都係要早起湊細路煮早餐，除咗最基本嘅三餐之外，我仲要熬骨湯整酸菜，每次煲完骨湯嘅10L超大煲都要用手洗，你問我點洗？咪帶手套囉，你要做嘅話就一定有方法，方法總比困難多！如果對膠手套敏感嘅話就戴對棉手套隔住，的確咁樣係會令到做嘢好唔方便，對手好唔靈活，但總好過痛。更加好過咩都唔做坐喺度抱怨自己有幾病，依啲都係面對濕疹時心態同想好的決心所影響的事。
「我嘅例子都係希望各位媽媽唔好輕易放棄！」
濕疹又有另一個問題好棘手嘅，就係就算你做緊啱嘅嘢佢都可以有機會繼續發。因為康復的道路上並唔係平坦㗎，病情嘅起伏都係康復嘅必經之路。譬如話你戒食咗某樣食物點解仲發嘅，可能係你根本唔係對果樣食物敏感，又或者係你真係對嗰樣食物敏感。所以當你停左食用嗰樣食物之後，你個身體排返之前你食過嗰樣食物嘅毒素出來。而我自己會做嘅嘢係不斷聆聽自己身體嘅需要，我個人認為要知道自己對咩敏感係冇可能嘅事，所以我冇選擇到胡亂咁樣戒口。我直覺覺得啱嘅嘢例如骨湯同埋酸菜，就算可能會令到我有啲發，我都會繼續。因為我相信呢啲食物長遠會對我身體好嘅，只要努力堅持，我哋身體要承受痛苦嘅日子只會係一路倒數緊。(但我都唔建議個個都跟住咁做，因為依樣都係我個人經歷同諗法，只供參考。)
我一個師奶一直打文分享都係希望可以比到啟發大家，令大家多一點知識去面對濕疹依個病。加油各位媽媽！
~ 濕•疹•同•路•人🧍🏼♂️~ 