Kitty媽濕疹歷史對抗心態 (part 1 of 2)
「人定勝天，我知道只要我們大人努力找方法，一定可以令佢地斷尾，做個健康快樂嘅小朋友！」
利申：本人係一個完全冇受過任何專業醫學訓練嘅媽媽，只是分享返自己之前醫治自己小朋友嚴重濕疹到完全斷尾嘅經歷。所有資料只是提供參考之用，絕對不涉及專業嘅醫療診斷或者治療，建議大家在有需要的情況下應該醫療專家尋求協助同獲取專業醫療意見。
同自己爭扎左好耐時間好唔好去分享自己過去十年來一次又一次咁戰勝極頑固濕疹嘅經歷俾同路人好呢？最後喺家人嘅支持下懷著感恩嘅心情去開始分享。大家好，我係EEG (Ex Eczema Girls)媽咪，嬰兒嘅時候患過嚴重疾病，有幸能康復長大成人之後，但又被嚴重濕疹困擾。好好彩，我有好好嘅家人同朋友俾左好多愛同埋耐性同我去打呢場硬仗，幾年之後我大有好轉！
過去20年嘅濕疹經歷，成就我成功對抗濕疹嘅心態。我今年三十尾，18歲嗰年我喺美國讀緊書嘅時候，第一次發嚴重嘅濕疹。當時我嘅香港家人同埋喺美國嘅寄住家庭都冇醫濕疹嘅經驗，所以喺美國我只是去睇醫生，搽藥膏食西藥。我之後都冇好快翻發，at least 唔係爆得好嚴重，好多時候用少少藥膏就搞得掂，所以嗰陣時我都冇乜點理佢，唔知咁係好彩定唔好彩？哈哈
到咗大約五年之後，即係大概我22~3歲嘅時候，嗰時我已經嚟咗澳洲讀書同生活。我突然之間發濕疹發得好嚴重，仲要主要集中喺面同埋頸。要用到好強勁嘅藥膏先搞得掂，過幾日又發得更加嚴重。情況的不受控令要去睇醫生，咁西醫就開咗我人生第一次嘅口服類固醇俾我服用。嗰啲藥係好苦嘅，雖然好細粒但係佢喺口入面好容易溶，每次食完之後我都要食啲好甜嘅嘢去中和番。呢個好壞反覆的情況重複到第三次之後我先開始發現，啲藥食咗落去對身體的效用好像愈嚟愈低。最後未完全停晒西醫的療程嘅時候已經開始發，而長期口服類固醇係真係有佢嘅副作用。例如會成日都覺得超級肚餓係咁食嘢，我本身瘦底就唔係好覺肥，但係都覺得唔對路但又唔係好識得形容。
有樣嘢我係好彩嘅，我叫好快就明白到濕疹唔係皮膚問題，而係免疫系統出事。於是我又懶係醒咁叫家庭醫生轉介左我去免疫系統科，而唔係皮膚科。咁佢就叫我去做幾個驗致敏源嘅測試，有驗血嘅有篤皮膚嘅。報告出咗嚟我當然係乜鬼嘢都敏感，於是建議我做脫敏療程。大概就係注射啲致敏源係你身體入邊等你身體慢慢去適應，好似好有道理咁喎。但係個問題係我90,000幾樣野敏感我脫得邊樣？睇咗兩次之後，我就諗，你淨係話我知有咩敏感有鬼用咩。而家個問題係點解我會突然之間咁多嘢敏感，同埋我想知道我點樣可以避免令自己有更加多嘢敏感呀嘛。如果唔係我咪要成世都係到脱敏，笑喊。
Anyway，知道連西醫嘅免疫系統科都冇希望嘅時候，加上重複咗幾個回合口服類固醇之後覺得中伏唔對路。我就同自己講，我真係要的起心肝去停藥，即係唔食藥亦都唔搽藥膏，亦即是戒斷類固醇。
戒緊類嘅朋友應該想像到我會變咗咩樣， OK in case你地唔知就等我講下個experience 。一停藥的時候，我係可以由頭皮發到落腳趾尾，由頭到腳都瘋狂咁痕瘋狂咁出黃水，夜晚瞓覺嘅時候（如果瞓到嘅話）啲黃水都係唔停咁出，流晒喺個枕頭嗰度。到咗朝頭早啲水乾晒，條頸同頭髮就黐住係個枕頭袋度，仲有眼嘅四周都係不停咁有黃水出，所以朝頭早啲水乾咗我連眼都擘唔大。好記得腳趾尾都唔野少，因為啲腳皮厚，所以就算覺得入面好痕好痕，但係無論點樣出盡力拗到手指頭都痛都係拗唔到肉。我已經唔識得再形容係點樣辛苦，冇幾耐之後我個中醫朋友喺香港過咗嚟同我住，順理成章我就開始咗睇中醫。
做同樣的事，不要期望有不同的結果，所以我一直嘗試。
可能我嘅免疫系統已經比西藥搞得太壞，就算我點樣戒口點樣聽話去食中藥，中醫都真係唔係好幫到我。後來我更加發現，現代嘅中醫最大嘅問題係而家嘅中藥係唔同之前嘅中藥，真係古時嘅中藥係野生㗎係啲醫師上山去採嘅，而家嘅中藥係大規模咁耕種嘅。本身個效用已經會有一定程度嘅減弱，仲未計而家嘅農地好多時都有好多重金屬同埋本身耕種係需要用到大量嘅農藥。而且中藥係好容易生蟲嘅，所以儲存方面都要用上大量嘅殺蟲劑防腐劑。所以睇咗大概一兩年中醫之後，我已經冇再食中藥但係都又繼續去做針灸來保健。
OK，咁西醫同中醫都冇用咁仲可以點呢？當時有個同事就介紹咗我去睇順勢療法，嗰個治療師都幾有料係雪梨大學嘅教授。佢同我解釋，成年人嘅濕疹九成都係因為壓力而起嘅，所以雖然佢開俾我食嘅療劑冇咩明顯嘅效果。但係由嗰陣時開始，我就明白到心病還需心藥醫，要身體健康首先要心靈健康。（雖然呢個醫師講嘅嘢係最廢，但我亦都覺得係最正確同合理，所以佢係我了解自身免疫病嘅其中一個啟蒙老師。因為自身嘅壓力程度同自身唔識得釋放壓力或抗壓能力低而搞到免疫系統出事，所以壓力依樣野真係唯有自己先至幫到自己，但嗰陣時嘅我都係齋講，未係好識應該點去行動去做去改善自己問題。因為嗰陣時唔係好多途徑獲取資訊，所以令到好多嘢都係靠自己嘗試。)
~ 濕•疹•同•路•人🧍🏼♂️~ 