經歷和照片

一些不堪入目的經歷和照片

「西藥醫濕疹真係害人不淺，我唔希望任何人要經歷我所經歷的。」

我有段時間因為戒斷類固醇，全身紅晒發炎我都依然堅持去做運動去健身，過程中真係好辛苦好唔自在，又會有好多人望住，自己個身體咁樣又做得唔舒服。但係我知道運動係對身體有幫助就無論身體幾差都好都迫自己去郁下，至少出吓汗俾個身體運作。做與不做有時都係取決於你的決心，因此我經常強調心態的重要性。我展示啲相唔係要話俾人知自己曾經幾慘，要得到人同情。我係要話俾你地每一個面對緊濕疹嘅人，選擇西藥去持續作治療真係一條不歸路，每次你去到無計可施的時候只會愈用愈多，身體內裏只會愈來愈差。我用自身例子係想去警世，唔想大家行咁多冤枉路，甚至要去到我咁差的情況。因為我清楚知道濕疹真係可以令人自殺，我唔係講笑，唔好同我講咩皮肉之苦好少事。

其實我自己有咁多年濕疹，我都見過好多自己高低起伏的位置，但係真係冇諗過自己真係要見到最差最差嘅自己。要面對自己最差的一面的確都唔容易，但唯有接納和學識愛自己，才是真正幫到自己的出路。外在的皮膚狀態絕對和心理狀態有關聯，因此我經常強調要用一個正面樂觀的心去面對濕疹。的確事實已經發生在我們身上，我們身上的濕疹都是那一刻無法改變的事實，但唯有利用如何的角度和心態去看自己，才能有機會走出一直困擾自己的濕疹。因為濕疹不單是一個皮膚病，同時也和你的情緒息息相關。

每次我自己望番啲相都好心痛自己曾經要經歷一啲咁痛苦嘅經歷，你可以不斷抱怨話點解咁唔公平，點解偏偏係自己有依個病。但係唯有你自己才是主宰自己人生的那一位主人翁。我最嚴重嘅時候真係照鏡都唔想見到自己嘅皮膚狀況，真係認唔到鏡入面嗰個係自己，成塊面紅晒甩皮，就算揸咩食咩都好似好唔返咁。隻腳曾經都水腫到成隻象腳咁，我諗係太多毒素積聚喺身入面，而身體機能無法排出，令到我成隻腳腫晒。連行每一步路都覺得好辛苦，更加唔好講點樣著返一對原先着到嘅鞋，日日都係著襪加拖鞋。我望住自己嘅身體同自己講，既然都跌到落谷底就一定冇得再差落去，將來的日子只會越來越好。唯有努力做好每一件對身體好的事，才能幫助自己去重拾一個健康的身體。

隻腳嗰陣時發炎的程度，就係行出街成條褲都會好似無啦啦濕咗咁樣，人地以為係有水滴落去。其實係啲炎症多到不斷出水，我成隻腳每一個傷口都出緊水先會睇到條褲係濕晒咁樣。嗰種感覺真係好難講俾大家聽係點辛苦法，真係有苦說不出的感覺。就算同人講搵人訴苦，我都相信唔會有幾多個明白個狀態係點樣。所以唯有都係靠自己去面對去捱過依一關，望住自己身體咁樣真係好痛苦，自己更加唔知個身體狀況點解可以去到咁差。可能係我真係太多年相信西醫的治療方法，令我行到去依一步返唔到轉頭的位置。唯有去穿越去面對先可以行得出依個難關，所以我覺得做所有嘢都係有代價，你選擇咗用一個咩嘅治療方式，就相應有返一個咩嘅結果。所以每做一個選擇嘅時候都要好好為自己做嘅決定負責任。而我呢一個就係一個人版俾大家睇，一個錯誤的示範。千祈唔好行我依條路，你係無辦法想像有幾難行。