Who Am I?
“THE REASONS I CHOSE TO BE DIFFERENT."
最初係咩原因令我知道類固醇是一條不歸路？又係點解會戒斷類固醇？
細個的時候我曾經以為類固醇係一種靈丹妙藥，可以好快即時地解決到我皮膚的問題。每次敏感、起濕疹，腦海就會即刻諗起「睇醫生嗱嗱臨搞掂佢。」只要聽醫生話就會好返是我從小被灌輸的概念，我相信好多人都係咁。我由細個到大個整個成長階段就睇左好多唔同的醫生，政府的皮膚專科都大約睇左四至五年左右。真係尋尋覓覓眾多的方法都依然未能痊愈，只能用藥控制。
年少的我去睇政府醫院容鳳書的皮膚科專科，由起初充滿憧憬覺得專科醫生咁厲害，一定可以有機會幫到我，因為大家都知道政府醫院專科係要排一段比較耐的時間，而我都排了一段時間才有得睇。既然難得有機會可以睇，咁我就咩都聽晒專科醫生講，跟足佢講的方法去照做照醫，希望可以由此真係有更加好的身體狀況。過程中就算跟足指示去做，睇了好幾年都依然沒有好轉，濕疹依然反反覆覆地出。去到後期我去睇醫生覆診的時候，因為覆診得太多次，係變到直頭醫生開邊隻藥膏邊隻敏感藥我都一清二楚。因為用得太耐我都對啲用途同功效點食法都記得晒，西藥開的藥嚟嚟去去都係嗰幾種。雖然唔會識啲藥物名，但我已經認得晒啲樣同有咩用。同時亦開始都對醫生沒有抱持甚麼太多期望會令我好返。越嚟越對自己沒有信心和希望去醫返好依個病，因為真係試過太多，同時亦都失敗過太多次，所以慢慢已經磨滅左我想康復的意志。
之後的覆診變到好似去同個醫生吹水和例行公事一般，咁皮膚專科的醫生都同我分享啲藥物邊啲用喺面，邊啲用喺腳到。而其中原因係因為皮膚在不同位置的厚度都唔一樣，所以就要用唔同程度藥性的藥膏。傾下邊啲藥有效冇效，又傾下自己試過咩方法。因為攞自己個身體試咗咁耐，好清楚究竟啲藥係咪真係幫到我。一路傾邊啲藥無咩效，邊啲位置要用一啲更加重藥性的先會有效果，好似我仲清楚個病多過醫生。而我一直都係用自己身體摸索究竟點樣先係幫到自己身體，因為我發覺永遠冇一個正確答案喺個社會上。呢個又話咁樣好返、嗰個又話咁樣好返，但係我們都一直未搵到自己可以點樣好返。
「用藥物堆砌出的健康，並不是真正的健康。」
我次次去排政府醫院都要排成幾個鐘，喺入面我都成日觀察好多唔同嘅患者係點樣，甚至仲會撩佢哋傾吓計，睇吓人哋用過咩方法或者經歷過啲咩。見住有咁多不同程度的皮膚問題的人在周圍一齊等睇醫生先令我知道原來香港係有咁多人係有皮膚問題，我們並不是少數，真係有好多同路人都在各自為自己的身體努力緊。有時我見到比較嚴重的患者我都會好心痛佢地個狀況，因為我好明白嗰種痛、嗰種苦，喺背後究竟係幾影響佢哋的日常生活，無經歷過嘅人係好難想像到呢種病係有幾麻煩。
因為我細個嘅時候試過太多方法，由一開始會抱持一絲希望咁去不停試新的治療方法，又睇中醫、又睇旺角咩皮膚聖手、針灸、艾灸、天灸通通都試過晒。甚至德國脱敏機，幾萬蚊幾萬蚊咁去洗，病況依然反反覆覆未能根治。在過程中，一直去搵一個真係幫到自己的方法，但係去到有一年，我聽到由一個專業醫生口中説到:「濕疹係冇得根治嘅病。」我嗰吓聽到真係好無奈，因為連一個專業醫生都講呢句說話嘅時候，真係會打消咗好多人對這個病康復的希望。久而久之變得越嚟越唔想試新的方法，因為既然都好唔返，唯有用合適劑量的西藥去控制住病況。自己都冇再抱住好大嘅希望去搵根治方法，只好欣然接受依個病喺我身上。因為重重複複的失敗只有令自己越嚟越氣餒，再加上醫生都講到咁我仲可以點。同時每試一個新方法其實都需要勇氣，因為你唔知道有咩風險，會唔會令濕疹爆出嚟發得更加多。就係依種未知之數令有皮膚病的人都唔想再試新的治療方法。雖然好多身邊人都提供不同類型嘅方法俾我哋，但係點解冇去試或者係唔想去試，呢個就係當中令人卻步的最主要原因。
所以好多人都唯有選擇用西藥去抑制住自己的皮膚問題就足夠，令自己可以應付到日常生活中要做的事情。皮膚狀態唔好真係會影響到好多好多生活上要做的事，你會冇心情、冇精神去做原本平時做到的事。當然你意志夠堅夠係無野阻到你的，但人的情緒總有高低起伏，你望到自己皮膚唔好我都相信唔會有個特別好的心情。而依個問題我都相信纏繞住好多有濕疹的同路人，自己要處理好多情緒上的波幅，又要調整自己的心態去面對濕疹呢件事，真係會好消耗精神意志的。因為人的思想總是有負面和正面兩部份，如何由負面的自己扭轉到正面去看待生活上大小二事，係我哋同路人們日常中經常要做的事。(全身爛晒都要保持開心積極，我諗都唔係一件易事。)講遠咗添，返返嚟先。講返西藥點解係咁多人選擇嘅原因，正正因為夠方便夠快見到效果，所以先會引入咗西方國家的這種藥物去醫治濕疹這個病。但問題就來了，究竟要用食幾多類固醇搽幾多藥膏先可以好返？究竟點為之真正的好返？表面的好返代表真係好返？濕疹係咪食完幾日藥就可以好返到的病？濕疹的根本問題在那裏？
「做同樣的事，不要期望有不同的結果。」
其實這些問題都好值得每一個同路人諗一諗，我哋好多人都知道西藥唔係一個長遠的方法，但係我哋就一路持續地使用依個方法去醫治這個病，因為當你有問題嘅時候你點都係想用最快最穩陣的方法去令自己好返，而西藥好明顯就比到依個效果，覺得濕疹係食幾粒藥俾少少錢就醫得好嘅病，跟住就可以如常咁返去做自己要做嘅嘢。(咁又係咪真㗎呢？)
其實咁樣的做法只會令身體越嚟越差，越嚟越依賴藥物去醫個病，而你就繼續去消耗身體。每次都係咁樣重複重複，從來冇調理過身體或者係養好身體。咁試問又點會真正好返呢？
過去的我平時都會食敏感藥去控制濕疹，因為相比類固醇個傷害無咁大，但你知藥物始終都會對身體有一定影響，有好有唔好，好老實講個身體五臟六腑吸收咁多藥物又有幾多成係可以排返出嚟，而無排出體外的又會如何影響身體和積聚毒素呢？大家可以自行想像一下。
我用敏感藥嘅原因係想降低發病嘅機會，希望身體可以更加穩定，令我可以做到日常要做的事，不希望受濕疹所影響。過去的我都真係食咗好多好多唔同類型嘅西藥，例如敏感藥、抗生素同類固醇等等………….
~ 濕•疹•同•路•人🧍🏼♂️~ 