生日後的入廠之旅
「不是看到希望才堅持，而是堅持才會有希望。」
唔好睇嗰時好似靚靚囝囝咁，其實都係靠filter先影到咁，嗰陣條頸個身體依然都係好多敏感，要靠食西藥先可以抑制住發炎問題。[一年前的生日，被人水左去食港女Tea，係開心嘅。但隔左幾日就發炎發到隻腳腫晒入左廠。等價交換？]
咁生日固知然緊係要慶祝嘅日子，咁破戒都係在所難免，梗係要食啲自己開心嘅嘢啦，人生在世，食在當前。(絕對係歪理，病緊嘅朋友千祈唔好好似我咁)，記得要對自己身體負責任呀。平時都會見到啲好嘢食都要忍口，一年一次的生日就係一個最好藉口同自己講，食咗先啦之後再算啦。有得食好西真係一件好幸福嘅事，食嘅過程真係幾開心嘅，可能正常人未必會明白皮膚病嘅人經常都要同自己講唔食得依啲又唔食得嗰啲，因為如果食完一啲唔健康的食物之後，一來對身體唔好啦，二來就係會好有罪惡咁。好老實講你總係知道食嗰啲嘢唔係平時會食亦深知唔會健康得去邊。所以食嗰吓的確係好開心，味覺上的滿足，我嗰刻淨係知道要好好感受當下嗰種感覺，細心品嘗破戒的一餐。但係現實係殘酷的，唔洗諗都知之後係要payback還債。因為你個身體處於唔穩定嘅狀態，嗰陣時的我都係靠食西藥去控制住個狀況令我仲有足夠能力去見人食飯。
但係之後問題就嚟啦，因為生日玩得太開心，食嘢又食得太過分，開始身體嘅炎症越嚟越嚴重，甚至係藥物無法抑制。(我諗而家回想返係因為食得太多有糖嘅嘢，例如tiramisu，幾個生日蛋糕，港女Tea，同埋蜜糖炸雞。我諗呢啲全部都係要戒口嘅食物，咁我嗰段時間就一次過食晒，真係諗起都興奮！)
之後就係大家最期待嘅入廠之旅，究竟發生咩事搞到要咁嚴重入急症室呢？仲要一住就住左幾日呢？因為我隻腳開始不斷發炎，而且係食藥都撳唔住嗰種狀態，真係誇張到可以成隻腳爛晒咁樣，好多好多嘅水泡不斷流膿。咁起初都只不過係好似有啲汗皰疹咁樣狀況，有一啲小水泡生咗喺隻腳度，我有生汗皰疹的經驗，之前係生喺隻手度，所以一開始冇乜為意，覺得過一排就會自己好返，但之後過左一段時間就唔知點解啲小水泡開始合體變做大水泡。咁問題就嚟喇，佢哋係永無止境咁生晒喺我成隻腳度，咁我不斷將佢發炎嗰啲濃唧出嚟(其他人千祈唔好好似我咁)，我就開發覺個問題好似嚴重到自己處理唔到，開始驚，真係未試過咁嚴重的程度。仲要啲膿係有味，瞓覺嗰時成張床都係，第二朝張被會濕晒咁。因為我自己處理極都唔好，仲好似越嚟越嚴重，屋企人我覺得我個情況真係唔係咁簡單，驚我遲啲會行唔到，就叫我去急症室睇。嗰陣時，我係誇張到出街成隻襪係好似濕咗水咁樣。
「緊記，在生命中，只有你自己才能拯救你自己！」
既然決定左去急症室就執齊行李，著好拖鞋去醫院渡假幾天。講真隻腳咁樣發晒炎真係好辛苦同麻煩，前嗰幾日著鞋出街又要就住就住咁行(因為好L痛)，知唔知最慘係咩？就係返到屋企除鞋的時候，你要將隻濕晒嘅襪，因為濕完又乾，黐住隻腳啲腳傷口真係除出嚟就再傷一次咁。
咁見到咁多水泡你身體度出現都知道自己免疫力開始有問題，因為皮膚狀態就係一個好快俾你睇到自己身體狀況的一個途徑。因為我咁多年同濕疹共處，令我累積了好多了解自身狀況的經驗，有時身體就係比緊一個警號你，話你知你的生活習慣出現了問題。我在那個時候依然未有正視自身的問題，覺得佢過一排就會自己好返，就冇理佢。但係那個時候的情況是已經控制不到身體出現水泡的問題，甚至日益嚴重。水泡好似處理極都仲有，仲變成一啲更加大的水泡。我那一刻看着自己的腳，都不明白究竟要如何處理，因為情況已經好像無法控制。科技如此發達，我便上網搜尋如何舒緩我面對中的問題，咁我就發現原來網上説那些水泡入面有很多細菌，如果處理不當便會很容易令感染的情況擴散開去。在我的悉心照顧下，我很小心地作消毒和希望把水泡內的細菌減少或除去。但最終得出的結果依然是沒有舒緩，在沒有辦法之下便決定到急症室尋求醫生的幫助。因為嗰陣時係成隻腳都已經係擴散到一個比較誇張的程度，不再是小小的一個水泡，令我行路都有困難，每行一步都感受到腳底下的痛楚，步步為營同時令我行動不便。
去到急症室就排隊等睇醫生，已經係要着住一對比較大的拖鞋先會冇咁痛，一個人帶齊野搭的士準備住院作治療，因為我好清楚狀況已經變得嚴重所以我便準備好一切。因為入院對我於嚟講唔係一啲咩大事，睇醫生更是家常便飯一樣，自己就抱住一個去休息的心態見醫生，話自己真係搞唔掂隻腳。咁醫生都係好例行咁開返啲藥同埋浸一啲殺菌的藥水，藥物當然有口服類固醇和抗生素，我本身都好抗拒再去食西藥治療自己的病，但係在沒有辦法的情況下依然要跟從醫生的安排。咁醫生就安排我入院治療，而我就當俾個時間自己休息和調整心態去面對自己的病。因為我這段時間已經停用西藥，不希望依賴西藥去醫濕疹。但是沒有藥物的依靠便令我非常難入眠，此情況令我差不多有半年以上無法好好睡覺。
在住院的途中發生了一點小插曲，就係瞓我對面有個呀伯成日同我傾計，但佢講講下又唔知點解自己喺醫院到，不斷同姑娘講要出院要返屋企。我諗佢應該係老人癡呆，但無諗過佢真係咁快就會唔記得啲嘢。我都唔知好笑定唔好笑，見住佢咁嘅情況真係不斷煩到姑娘同其他休息中的病人。但佢過每過一陣就喺到大嗌要出院，之後仲曳到自己執野自己話要走。好彩最尾都俾人捉返返床。仲俾人五花大綁咁唔俾佢郁，因為佢記憶短暫，佢過一陣就大叫問做咩綁住佢。佢仲係到大嗌嘈住全部人瞓，我真係得啖笑。佢話: 「你想瞓呀？好難呀。我無得瞓你地都無得瞓！」同大家分享條片同依件趣事令大家開心啲，我明白每個人在生活上都有自己的煩惱。但生活中經常都會發生不同趣事，唯有你活在當下，才能感受到那份喜悅！
佢夜晚喺度係咁大嗌，話佢冇得瞓覺全部人都唔可以瞓！但係佢過咗一陣自己瞓着咗。希望個伯伯唔會睇到我擺咗佢喺網上。笑喊Emoji。
~ 濕•疹•同•路•人🧍🏼♂️~ 