心路歷程(二) : [嚴重起來，照鏡都唔想見到自己。]
「你哋身邊都一定有啲好錫你的人，唔好因為自己個病而推開咗佢哋。」
喺最嚴重的時候(大約開始戒斷類固醇二至三個月左右)皮膚開始變得不穩定，一係就全身紅晒一係就龜裂乾燥。其實嗰時自己真係好唔鍾意照鏡，每次起身一望到自己都係唔會見到自己有任何好轉。我望到自己個樣、自己的皮膚裂開晒，出水流濃，啲衣服呀啲褲同襪都因為啲傷口痴住晒。每一次除出嚟都係痛到PK，跟住又會重新整損個傷口，有時見到咁我都會好氣餒，甚至出現好多想放棄自己嘅念頭。久而久之，我連照鏡望自己嘅勇氣都冇，燈盡量唔開就唔開，有幾暗就有幾暗，因為我真係唔想見到自己咁差的皮膚。但就算唔照鏡點都會見到自己手腳的狀況，我伸隻手出嚟就見到自己啲肉係紅晒爛晒，心情差就更加唔洗講啦。我情況最差的時候真係冇勇氣去面對自己，已經係嚴重到自己都唔鍾意自己。唔明白點解個身體會變到咁樣，好唔開心，真係好唔開心。
嚴重起來的時候，皮膚日日都換皮甩皮，新陳代謝速度真係好快，亦都好唔正常，每一次好返皮膚都要脱一層皮先可以出返啲靚皮膚出嚟。所以好多時都抱住一個希望就係甩完今次就會好，但好多時都事與願違，好完又差，永無止境般。同時都麻煩到屋企人，因為我屋企人有潔癖，已經好包容我的皮膚所帶來的影響。我有諗過如果啲皮係錢嘅話，咁就好，自己可以係咁周圍跌啲錢出嚟！
相信大家都知道皮膚乾燥同龜裂係會不斷甩皮，甩嘅程度係可以好誇張，啲皮嘅數量係可以滿天飛，掃埋一齊嘅時候係可以多到成碗飯咁。我絕對唔係講緊笑，皮膚嘅更新速度係可以快到咁，一邊修復一邊裂開，不斷重重複複咁，每次起身望住個地下望住張床，真係冇諗過自己啲皮係可以多到咁。日日瞓醒啲皮多到成床都係，喺屋企行到去邊就甩到去邊，長時間咁甩法，就會令到成個屋企都係充滿你嘅皮。最嚴重嘅時候真係行到邊，邊度就好似落雪咁，要唱Let it go, Let it go。雖然搞到屋企好污糟、皮屑滿天飛，但我真係好多謝嗰陣時屋企人的包容和體諒。見到我個病去到咁嚴重，就係咁用吸塵機日日吸，清潔多啲，俾一個好嘅環境我居住。
「我都真係好唔鍾意見到依一面的自己。」
好想每一個有濕疹嘅人知道，你哋身邊都一定有啲好錫你的人，唔好因為自己個病而推開咗佢哋。我明白有濕疹的人的確係好容易有唔穩定的情緒，但無論點都好，都要好好感謝身邊人對你嘅關心同關愛，雖然佢哋未必用一個最符合你心目中所想嘅方法去緊張你。但我相信愛你嘅人見到你咁嘅狀況個心都會好痛，好想為你做少少嘢去減輕你嘅病況。所以你都要打開自己個心去話俾身邊人知你需要啲咩支持，同點樣幫到手。因為好多時我哋人都係怕衝突或誤會而唔敢講好多嘢，咁就令到自己咩都收收埋埋係個心入面。但試問你唔打開個心人哋又點樣走進你個心呢，係咪先！
好彩而家出街要戴口罩，遮住塊面先可以冇咁多人望住，我相信有皮膚病嘅人都好介意別人嘅目光，不覺意地形住有人望住，係會好有壓力，所以好多有濕疹的同路人都會着長衫長褲去遮住自己唔好睇的皮膚。(1年前的諗法)
~ 濕•疹•同•路•人🧍🏼♂️~ 