~ 濕•疹•同•路•人🧍🏼‍♂️~

Who I Am?

You never know how strong you are, until being strong is your only choice.

揸類固醇基本上係由細到大嘅日常，屋企人都相當相信西藥的方法，因為快速見效，所以見到邊度敏感就揸邊度。咁當然除了西藥，我都試過唔同的中醫去調理身體，但係效果好自然就係冇咁明顯同埋慢。人就係咁樣㗎啦，永遠只會揀最快最有效果嘅方式，唔會諗邊樣先係真正好，就算你知道同清楚西藥的壞處都係會揀返代價冇咁大嘅方式去治理身體。由細到大濕疹都陪伴着我成長，一年四季，狀況時好時壞，好多時都係反反覆覆，有藥食、壓制住嘅時候就會穩定啲可以見下人。作息不正常和有情緒壓力的時候就自自然然變得差。所以我的身體狀況好一段時間之後又會差一段時間，永無止境咁循環落去。

不是因為看到希望才堅持，而是因為堅持才看到希望。

20幾年嘅濕疹經驗，反覆地去用藥，從來冇諗過背後嘅根源問題，只係壓制表面發炎嘅徵兆。我都係一個普通人都會用普通人嘅諗法去醫依個病，直到我去到後期真係發覺唔對路，用啲藥物越用越重，真係驚自己有一日會嚴重到無藥可醫，甚至係出現抗藥性的現象。近嗰幾年，開始發現自己對西藥越嚟越依賴同適應，藥效和劑量要不斷加強先有之前相似嘅治療效果。而且身體每況愈下，睇醫生醫生甚至叫我轉用其他高效免疫抑制劑，例如環孢素或者係再嚴重啲係要用抗癌藥。而我自己聽到都越嚟越驚，每次聽到我都開始懷疑醫生的用藥方式，究竟咁樣食啲藥係咪真係啱係咪會好。慢慢開始正視自身嘅問題，反思如果自己將來慢慢又適應新嘅更強效嘅藥物，會唔會到最尾真係變成無藥可醫。一諗到呢個位自己就開始識得驚，咁樣落去唔係辦法，就開始研究其他方面嘅知識去幫助自己…….

上網搵到外國究竟係點樣去醫濕疹依個病，跟住第一次聽到接觸類固醇上癮同埋類固醇反彈嘅概念。再睇返自己當下個狀況，發覺好似真係已經上咗癮用類用得太多。(我都唔知人生入面食咗幾多粒類固醇，揸咗幾多類固醇。) 嗰陣時已經去到唔係濕疹嘅問題，而係停藥嘅時候出現類固醇反彈的症狀，因為我不斷上網做research後學懂如何區分濕疹和類固醇反彈的分別。眼見自己成身一停用藥就會開始全身紅同不斷甩皮，啲炎症好似係已經處理唔到咁樣。咁我就下定決心去停用類固醇，用真正啱嘅方法去幫自己，唔再俾個身體接觸依樣嘢，希望佢自己有一個自我修復的能力。

咁呢個就係我踏上戒斷類固醇嘅過程同諗法，嚟緊再喺其他文章內講我係點樣穿越當中嘅問題。感謝你們每一個睇到呢度，呢個病嚴重起上嚟真係唔係咁簡單，另外坊間的認知都已經一直存在好多問題。去到最尾我就係成為咗嗰個問題，仲要係發晒出嚟，誇張到不得了，我都冇諗過人生係要經歷呢種低谷，要跌到落咁低咁低。

希望你哋每一個都唔需要嚴重到要經歷我嗰種程度，而我去分享自己個故事亦都係想提醒各位要正視自身問題和多思考如何才是一個幫自己的方法。戒斷真係真係好辛苦㗎，你係想像唔到我戒斷類固醇嗰陣時嘅日子係點樣過。個人係冇精神冇力去做所有嘢，每做一樣野都好似孭住千斤重嘅重擔一樣，每郁一個關節都會裂開，而裂開個種痛真係痛不欲生，不斷地提醒緊我我個身體真係有好多問題。原來個世界真係會變到得返黑白色咁樣，個天係灰，個心係碎，身心疲累到真係唔知點形容。

Courage is not having the strength to go on; it is going on when you don’t have the strength

初衷：皮膚病看似唔係一啲咩大問題，但其實嚴重起上嚟都真係好唔簡單，無論係心理上定身理上都有相當大的困擾。好想將自己咁耐以嚟對濕疹嘅認識同用自己身體嘗試過的方法去同大家分享，幫到更加多受緊同樣苦難嘅人，令大家可以走少啲冤枉路。因為我真係明白當中嘅痛苦，而依個病嚴重起上嚟真係可以好折磨好困擾。

呢度分享少少我過去皮膚去到最嚴重的情況是如何，的確唔係一般人可以承受得到和接受得到。所以我更加知道有好多人都處於水深火熱當中，得不到幫助甚至不懂得如何才能幫到自己。而這個正正是我一直堅持去分享自己20多年對這個病的認識和心路歷程，希望有更加多人可以走少啲冤枉路，更快更容易去重拾一個健康身體，不再受這個病所困擾………..