心路歷程(一) : [點解係我，點解偏偏係我有依個病。]
“FiveGuys tastes Good, But not good for our Health."
每次見到自己皮開肉裂的時候，其實好正常第一個諗法就係「點解咁多人都無事，就係得我有，仲要咁嚴重，公平咩？」我曾經都經常帶着抱怨的心去問自己，究竟自己係咪做錯啲咩，令到依個病係我身上一直都醫唔好，因為自己的濕疹真係太多太多年一直都未好到，試過咁多方法起起伏伏，好多種種嘅營養補充品都嘗試過，試嚟試去，最終都係要用返西藥我先壓制到個問題。(叫做有正常嘅皮膚，可以見得下人。) 但係我知道依個唔係濕疹人的出路，同埋有個病喺身真係會好影響日常生活。
身邊咁多人，點解個個都正正常常健健康康，個個同年齡的都可以鍾意做咩就做咩，去玩就去玩，冇一個會好似我咁有啲咁嘅問題限制住自己。仲要知道自己嘅濕疹唔係普通嘅濕疹，係可以大範圍到全身都有事，我見人地都係得啲關節位有小小乾小小紅，而自己嘅關節位係可以隨時爆開晒。點解個天對我咁唔公平，要我承受依種痛苦，老實講我真係唔知自己會唔會有一日頂唔順而做傻事。我見新聞都有個同路人因為濕疹而攞刀殺左屋企人，我嗰下聽到都真係好心痛，覺得點解會搞到咁，個病真係唔係普通人想像咁簡單。
“Say Try Me, Not Why Me. “
「因為個天睇得起你先俾個咁嘅考驗！」
過去的我都有好多負面思想，負能量真係一種可以持續影響人的東西，我都有情緒差到極點嘅時候，好多負面思想會自動自覺地淨現在腦海中，諗自己點解要受依種苦，濕疹仲要纏繞我幾耐，我都係想正常地生活，真係咁難咩。在和濕疹共存的時候，我自己要學懂如何和自己的情緒相處，如何調整自己的情緒，都是我們同路人很重要的課題！凡事都有兩面睇，用多啲唔同的角度去睇事，抱持感恩知足的心可以助你活在一個更開心的世界！雖然在起初的時候我都無辦法好快就轉換到好的心態去面對自己的濕疹，但經過嘗試不同的方法後便令我更容易去用好的心態去看待自己的皮膚問題。很多事情都不是一朝一夕便會很到變化，但只要你相信和堅持去做，用行動去證明給自己知道，自己是值得擁有一個健康的心態和身體。首先係要你自己都要相信自己會好起來的，唯有你自己才可以拯救你自己的人生。
絕對唔好睇少一個病對人的影響，我亦都希望更多的人去了解和關心多點身邊有濕疹的朋友。多一點關懷或許你已經可以救返一個處於水深火熱因濕疹而受苦中的人。少一點批判，多一點關懷。因為你永遠唔知幾時是別人支撐的臨界點，你永遠唔知其他人背後背負住幾多嘢。好多人都正在自己一個堅強地撐著自己人生的低谷，再用最好的一面去見人去社交。所以見到同路人時，多一點包容、欣賞和同理心。每個人都正在努力成為最好的自己。
「逆境當中，都要保持正面，我成都提自己要笑多啲，正向人生。」
~ 濕•疹•同•路•人🧍🏼♂️~ 